ФОТОГАЛЕРЕЯ: Пойтахтимизда 50 минг долларлик Халқаро турнир ниҳоясига етди

Умумий соврин жамғармаси 50 минг АҚШ доллари бўлган бу нуфузли турнирда 10 та хориж давлатларидан 100 нафардан ошиқ шахматчи иштирок этди. Рейтинг натижаларига кўра, “А” ва “Б” гуруҳларига бўлинган шахматчилар 9 тур давомида ўз маҳоратларини намоён эта олдилар. Якуний натижаларга кўра, Валентина Гунина “А” гуруҳида пешқадам бўлди. Ушбу гуруҳнинг кейинги ўринларини Нилуфар Ёқуббоева ва Анастасия Боднарук эгаллади.

14 ёшгача бўлган қизлар ўртасида Нилуфархон Имомқўзиева, 16 ёшгача бўлганлар ўртасида Алия Нурманова, 20 ёшгача бўлганлар ўртасида эса Зейнеп Султанбекова ғолиблик нашидасини сурди.

“Б” гуруҳида ғолиб ва совриндор бўлганлар орасида ҳамюртларимиз Зилола Актамова, Озода Шахзодова, Малика Жумаева, Севинч Давлатова, Мумтозбегим Мансурова каби шахматчилар бор.

I-Халқаро турнирнинг ғолиб ва совриндорларини тақдирлаш маросимида Халқаро шахмат федерацияси масъуллари, Камбағалликни қисқартириш ва бандлик вазирлиги мутасаддилари ҳамда шахмат фахрийлари, оммавий ахборот воситалари ходимлари иштирок этди. 

Маросим давомида  Осиё шахмат федерациясининг “Осиёнинг энг яхши ёшлар терма жамоаси” сертификати мамлакатимиз ёшларига тантанали равишда топширилди.

Суратлар муаллифи: Алимурод Мадаминов, olamsport.com муҳбири