Франсис Нганнунинг собиқ мураббийи жангчи билан бўлаётган низоларга чек қўйди

UFC жангчиси Сирил Ганнинг айни дамдаги мураббийи Фернанд Лопес ўзининг собиқ шогирди Франсис Нганну билан ортиқ баҳсга бора олмаслигини билдирди.

"Мен икки фарзанднинг отасиман. Мендан эса қайси бир фарзандинг яхши деб сўраяпсиз. Бу саволга жавоб бериш қийин. Сабаби бирини мақтасам, бошқаси бундан ранжийди. Мен эса бошқачароқ гапирмоқчиман. Сирил ҳам, Нганну ҳам ажойиб спортчилар, улар ҳозир энг юқори чўққида туришибди. Мен уларни солиштирмоқчи эмасман. Бу ҳикоядан тўғриси чарчадим.

Мен исталган вақт Нганну билан қўл бериб кўришишга ва суҳбатлашиб олишга тайёрман. Тўғри, биз энди ҳеч қачон бирга ишлай олмаймиз. Аммо учрашиб, икки оғиз суҳбатлашимиз мумкин деб ўйлайман. Бу шунчаки спорт, ундан ортиқ нарса эмас. Мен Нганну билан дўст бўлмаслигим мумкин, бироқ биз ўзаро ҳурматни сақлашимиз лозим", - дейди Фернанд Лопес.

Эслатиб ўтамиз, Тошкент вақти билан 22 январдан 23 январга ўтар кечаси Анахайм (Калифорния, АҚШ) шаҳридаги "Honda Center" аренасида UFC 270 турнири бўлиб ўтади.