Freestyle Chess Grand Slam Paris. Карлсен - Абдусатторов ва қолган плей-офф натижалари

Икки кунлик рапид баҳсларидан сўнг плей-офф босқичига йўл олган шахматчилар маълум бўлганди. Кеча 1/4 финал босқичининг илк учрашувлари ўтказилди. Шунингдек, 9-12 ўринлар учун илк ўйинлар бўлиб ўтди. 

Афсуски, Нодирбек Абдусатторов (Ўзбекистон, 2773) чорак финалнинг илк партиясида қора доналарда ўйнаб, Магнус Карлсен (Норвегия, 2819)га имкониятни бой бериб қўйди. Магнус бежизга ўзига рақиб сифатида танламаган экан. Абдусатторов сўнгги пайтларда Карлсен учун қулай рақибга айланиб боряпти. Бугун шахматчилар ўртасидаги иккинчи партия ўйналади ва унда Нодирбек оқ доналарда ҳаракат қилади. Фақат ғалаба 1/2 финалга чиқиш учун имкониятни сақлаб қолади. Ҳамюртимиз ғалаба қозонган тақдирда ҳал қилувчи тай-брек ўйналади.   

Чорак финалнинг қолган барча жуфтликларида дуранг натижа қайд этилди. 

Freestyle Chess Grand Slam Paris. 1/4 финал натижалари

Ян Непомняший - Винсент Кеймер - 0,5:0,5

Магнус Карлсен - Нодирбек Абдусатторов - 1:0

Максим Вашье-Лаграв - Фабиано Каруана - 0,5:0,5

Аржун Эргаиси - Ҳикару Накамура - 0,5:0,5

Амалдаги жаҳон чемпиони Гукеш Доммараджу яна мағлубиятга учради. Саралаш баҳсларини муваффақиятсиз ўтказиб, кучли саккизталикка кира олмаган ҳиндистонлик гроссмейстер 9-12 ўринлар учун кечаётган плей-оффнинг илк учрашувида руминиялик Рихард Раппортга имкониятни бой бериб қўйди. Ҳинд дербисини ташкил этган иккинчи жуфтликда эса Рамешбабу Прагнанандха ватандоши Видит Гужратҳидан устун келди. 

9-12 ўринлар учун 

Рамешбабу Прагнанандха - Видит Гужратҳи - 1:0

Рихард Раппорт - Гукеш Доммараджу - 1:0