Фрэнсис Нганну Сирил Ган ва собиқ жамоаси билан бўлган воқеага изоҳ берди

Оғир вазн тоифасида амалдаги UFC чемпиони Фрэнсис Нганну нима учун Нью-Йоркдаги UFC 268 мусобақасида собиқ жамоаси аъзоларининг ёнидан ўтиб кетганини тушунтириб берди. 

Нганну Даниэл Кормьега берган интервьюсида: «Мен бу вазиятда олдида бироз ноқулай бўлган ягона одам Сирил Ган эди».

Камерунлик оғир вазнли спортчининг сўзларига кўра, у собиқ жамоадошларига фақат бир неча йиллардан бери зиддиятли муносабатда бўлаётган мураббий Фернанд Лопес туфайли салом бермаган.

«Мен юқорига чиқиб, у билан саломлашишни хоҳламадим, чунки мен бу одамдан узоқроқ туришни афзал кўраман. Агар мен ўрнимга бориб, салом берсам, бу унга мен ҳақимда яна нимадир дейишига асос бўларди – у бу вазиятни ўзгартириб, мен айтмаган гапларларни яна менга боғлаши мумкин эди. Қолаверса, у менинг саломимга муҳтож эмасди. У билан мен дўст эмасмиз ва у доимо матбуотда менга ҳужум қилади. Мен эса унга шундай жавоб бера олмайман. Бу менинг услубим эмас».

Ганни Нганну ундан бир неча сантиметр узоқда юриб, Нассурдин Имавов билан саломлашмагани ғазаблантирди, аммо UFC чемпионининг таъкидлашича, у шунчаки собиқ спарринг шеригини пайқамаган.

«Мен яқинлашганимда Лопес ва Ганни кўрдим ва шунинг учун ўша оқшом жанг қилаётган Имавовни ҳам пайқамай, бошқа томонга қарадим. Имавов ҳамда Ган билан ўртамизда ҳеч қандай муаммо йўқ, лекин уларнинг ёнида бир йигит бор эди, у билан учрашиш мен учун доим ноқулай. Агар мен Фернандга эмас, балки уларга салом берганимда, бундан ҳам ёмонроқ кўринарди. Бу жуда қийин вазият эди ва мен бундан бошқа қандай қилиб чиқиб кетишни билмайман», - дея изоҳ берди Нганну.