Фриц Ар-Риёддаги кўргазмали турнир финалида Медведевни мағлуб этди

Мусобақанинг ҳал қилувчи финал учрашувида россиялик Даниил Медведев ҳамда америкалик Тэйлор Фриц бош соврин учун ўзаро баҳс олиб боришди. Баҳс "Diriyah Arena" стадионининг хард қопламали марказий кортида бўлиб ўтди.

Бир соату 52 дақиқа давом этган муросасиз учрашувда Фриц 7:6 (7:5), 7:6 (7:3) ҳисобида номдор рақибини мағлуб этди. Ўйин давомида америкалик теннисчи тўққиз бор эйс зарбасини амалга ошириб, уч марта қўшхатога йўл қўйди. 

Медведев ҳисобида эса 10 та эйс зарбаси бор, тўпни ўйинга киритишда бир марта хатога йўл қўйди ва тўққизта брейкнинг бириртасидан фойдалана олмади.

Турнирдаги ғалаба учун Фриц 1 миллион, Медведев эса 500 минг доллар миқдорида пул мукофоти ишлаб олди.

Эслатиб ўтамиз, мусобақанинг ярим финалида Даниил Медведев швейцариялик Стен Вавринкани мағлуб этган бўлса, Тэйлор Фриц 1/2 финалда британиялик Кэмерон Норридан устидан ғалаба қозонган эди.