Фьюри Фрэнсис Нганнунинг ғалабасига муносабат билдирди, "Йиртқич" бунга жавоб қайтарди

"Фрэнсис Нганнуни табриклайман, лекин агар сен ҳақиқатдан ҳам пул ишлашни истасанг, "Лўлилар қироли" билан юзма-юз бўлишинг керак”, - деб ёзди британиялик боксчи камерунлик оғир вазнли спортчига ишора қилиб.

"Йиртқич" бунга жавобан UFC билан амалдаги шартномаси бўйича жанг ўтказмаслигини ва Фьюри билан бокс жанги унинг учун биринчи ўринда эканлигини айтди.

"Нганну Фьюрига қарши. 2022 йил ", - деб ёзган UFC чемпиони.

Анахайм шаҳрида ўтган UFC 270 турниридаги ғалабадан сўнг Фрэнсис Нганну 600 000 АҚШ долларга эга бўлди, Тайсон Фьюри эса Деонтей Уайлдер билан бўлган сўнгги жанги учун 30 миллион доллардан кўпроқ гонорар олган.

Сирил Ган билан жанг Фрэнсис Нганнунинг UFC билан амалдаги шартномаси бўйича охиргиси бўлди, аммо камерунлик спортчи ўз унвонини ҳимоя қилишга муваффақ бўлгани учун шартнома автоматик равишда бир йилга узайтирилди. Турнирдан кейин ўтказилган матбуот анжуманида UFC чемпиони агар ташкилот унга тўлиқ мос келадиган шартнома таклиф қилмаса, шартнома муддати тугагунча бўш ўтиришга тайёрлигини айтди.

Эътиборлиси, UFC президенти Дана Уайт чемпионлик камарини Фрэнсис Нганнуга топширишдан бош тортиб, бу камарни ташкилотнинг бош матчмейкери Мик Мейнардга топширган ва анъанавий матбуот анжуманини бекор қилиб, аренани тарк этган.

Эслатиб ўтамиз, аввалроқ Тайсон Фьюри Фрэнсис Нганнуга қўлқопда бокс жанги ўтказишни таклиф қилган ва камерунлик бу имкониятни UFC билан янги келишувнинг бандларидан бири сифатида кўришни истаётганини очиқ айтганди.