Геннадий Головкин энди расман бокс афсонаси! (+ФОТО)

АҚШнинг Канастота шаҳрида бўлиб ўтган тантанали маросимда у Халқаро бокс шон-шараф залига (IBHOF) қабул қилинди.

Бу нафақат Головкиннинг шахсий ютуғи, балки бутун қозоқ спорти учун муҳим воқеа сифатида баҳоланмоқда. Чунки мазкур шарафга дунё боксининг энг буюк намояндаларигина муносиб кўрилади.

Головкин ҳаваскорлар боксида 350 та жанг ўтказиб, шуларнинг 345 тасида ғалаба қозонган. Қозоғистон терма жамоаси сафида жаҳон чемпиони бўлган ва Олимпия ўйинларининг кумуш медалини қўлга киритган.

Профессионал рингда эса Геннадий ўрта вазн тоифасининг энг кучли ва хавфли боксчиларидан бири сифатида ном қозонганди. У проф фаолияти давомида 45 та жанг ўтказиб, 42 марта ғалаба қозонган.

Шунингдек, Головкин турли йилларда WBA, WBC, IBF, IBO ва The Ring чемпионлик камарларига эгалик қилиб, узоқ вақт давомида дунёнинг энг кучли боксчилари рейтинги — Pound-for-Pound (P4P) рўйхатида етакчилардан бири бўлиб келди.