Гейниш ва Чигирев учун катта имконият: Қишки Олимпиадага йўлланма берувчи турнир санаси ва манзили эълон қилинди

Квалификацион турнир 2025 йилнинг 17-21 сентябрь кунлари Хитойнинг Пекин шаҳрида ўтказилади. Бу ҳақдаги қарор ташкилотнинг 11 декабрь куни ўтказилган Кенгашида қабул қилинган.

Мусобақада фигурали учишнинг спорт жуфтлиги йўналишида Ўзбекистон терма жамоаси аъзолари Екатерина Гейниш ҳамда Дмитрий Чигирев ҳам иштирок этиши мумкин.

Маълумот ўрнида, Милан ва Кортина-2026 XXV қишки Олимпия ўйинлари 2026 йилнинг 6-22 февраль кунлари ўтказилади.

Шунингдек, ISU кейинги мавсумдан бошлаб, Гран-при босқичларининг ўтказилиш тартиблари қуйидагича ўзгартирилишини эълон қилди:

1. Skate America

2. Cup of China

3. Skate Canada

4. NHK Trophy

5. Grand Prix de France

6. Finlandia Trophy.

Эслатиб ўтамиз, Екатерина Гейниш ва Дмитрий Чигирев жорий йилги мавсум давомида октябрь ойи охирида Канада Гран-при босқичида қатнашди. Улар умумий 189,65 балл жамғарган ҳолда ўзларининг энг яхши натижаларини қайд этиб, кумуш медалга эга чиқишди. Шундан сўнг, спортчиларимиз Франциянинг Анже шаҳрида ташкил этилган босқичда иштирок этиб, 161.99 балл жамғаришганди.

Маълумот учун, Екатерина ва Дмитрий жуфтлиги айни пайтда жаҳон рейтингида 38, мавсум рейтингида эса 12-ўринни эгаллаб турибди.