Ғолибини 10 000 доллар кутаётган Президент соврини учун Ал-Ҳаким Ат-Термизий халқаро хотира турнир ўтказилади

Жисмоний тарбия ва спорт вазирлиги, Миллий Олимпия қўмитаси, Ўзбекистон кураш федерацияси ҳамда Сурхондарё вилояти ҳокимлиги ташаббуси билан ўтказилаётган турнирнинг очилиш ва ёпилиш маросимларида республиканинг таниқли маданият ва санъат намояндалари иштирок этиши белгиланган.

Бугунги пандемик вазиятни инобатга олган ҳолда Халқаро турнир санитария-эпидемиология қоидалари асосида ташкил этилади. Шу муносабат билан Соғлиқни сақлаш вазирлиги мусобақа ўтадиган жойлар гигиена талабларига мос бўлиши, иштирокчиларга юқори савияда тиббий хизмат кўрсатилиши, меҳмонхоналарда ва мазкур турнир бўлиб ўтадиган “Алпомиш” ўйингоҳида зарур тиббий анжомлар, ниқоб, дори ва антисептик воситалари мавжуд бўлишини таъминлаши лозим.

Ўзбекистон Республикасида коронавирус инфекциясининг тарқалиши билан боғлиқ эпедимиологик вазият барқарорлигини таъминлаш мақсадида:

– ҳаво ва темир йўл қатновлари орқали Ўзбекистон Республикасига ташриф буюраётган халқаро турнир иштирокчилари республикага келиш учун ҳаво ёки темир йўл қатновига рўйхатдан ўтишдан олдин сўнгги 72 соатдан кўп бўлмаган муддатда коронавирус инфекциясига фақат ПЗР (полимера занжирли реакация) орқали текширилиб, манфий кўрсаткичга эга деб топилган маълумотномани тақдим этиши лозимлиги;

– автойўл чегара ўтказиш пунктлари орқали Ўзбекистон Республикасига кириб келаётган халқаро турнир иштирокчилари сўнгги 72 соатдан кўп бўлмаган муддатда коронавирус инфекциясига ПЗР (полимера занжирли реакация) орқали текширилиб, манфий кўрсаткичга эга деб топилган маълумотнома такдим этилганда ёки ПЗР натижаси бўлмаган ҳолларда, чегара ўтказиш пунктларида фаолият юритадиган махсус клиника ёки лабораторияларда коронавирус инфекцияси антигенини экспресс тест текшируви орқали манфий натижа қайд этилган маълумотнома тақдим этилган тақдирда, Ўзбекистон Республикаси ҳудудига киритилиши инобатга олинади.

Таъкидлаш керак, Ал-Ҳаким Ат-Термизий халқаро турнири ғолиби 10 000 АҚШ долларини қўлга киритади.