"Грунт қироли" "Ролан Гаррос"даги иштирокини бошлади

Сайёрамизнинг иккинчи ракеткаси Рафаэль Надаль мусобақадаги иштирокини ғалаба билан бошлади. Испаниялик теннисчи 2 соату 5 дақиқа давом этган илк давра учрашувида рейтингнинг 83-поғонасидан бораётган беларуслик Егорь Герасимовни таслим этди - 6/4, 6/4, 6/2.

Баҳс давомида 34 ёшли Рафаэль 3 та, 27 яшар Герасимов эса 1 та эйс зарбани амалга оширди. Бу теннисчиларнинг ўзаро илк учрашуви эди. Энди "грунт қироли" Франция очиқ чемпионатининг иккинчи босқичида америкалик Маккензи Макдональдга қарши кортга чиқади. Маккензи биринчи даврада канадалик Стивен Диезни 4/6, 6/3, 6/3, 6/4 ҳисобларида мағлубиятга учратди.