Грузия билан спорт соҳасидаги алоқалар янада мустаҳкамланади

Грузиянинг Ўзбекистондаги Фавқулодда ва Мухтор Элчиси Зураб Абдушелишвили, Грузия таэквондо федерацияси вице-президенти Роин Варшанидзе ҳамда делегация вакили Александр Кипианидан иборат меҳмонлар МОҚ раиси қабулида бўлишди.

Меҳмонлар МОҚга ташрифдан аввал Ўзбекистон таэквондо ассоциациясида ҳам бўлишганини алоҳида айтиб ўтиш жоиз. Боиси, ушбу мамлакат таэквондочилари ҳамюртларимиз билан қўшма ўқув-машғулот йиғинини бошлаш арафасида турибди. Ассоциацияга ташриф давомида меҳмонлар Ўзбекистон терма жамоаси мураббийлар штаби, машғулот заллари билан яқиндан танишдилар.

МОҚда бўлиб ўтган учрашувда Рустам Шоабдураҳмонов ва унинг ўринбосарлари Ўзбекистон дзюдо федерацияси раиси Азизжон Камилов ҳамда Ўзбекистон таэквондо WT ассоциацияси раиси Шерзод Ташматов иштирок этишди. Дўстона кечган суҳбатда йирик мусобақаларга тайёргарлик кўриш, ҳамкорликда ўқув-машғулот йиғинларини ташкил қилиш каби масалалар атрофлича муҳокама қилинди.

“Грузия бизнинг спортчилар учун жуда аҳамиятли. Кўплаб спорт турларида жамоаларимиз у ерга ўқув-машғулот йиғинлари учун тез-тез бориб туришади. Жумладан, ҳозирда қиличбозларимиз Грузияда бўлиб туришибди. Юртимизда Президентимиз бошчилигида спортга алоҳида эътибор қаратилади. Мамлакатимиз тараққиётида 5 муҳим ташаббуснинг бири айнан жисмоний тарбия ва спортни қамраб олади. Шу ўринда, келажакдаги ҳамкорлигимиз йўлида меморандум имзолаш таклифини илгари сурмоқчимиз”, – деди МОҚ раиси.

Суҳбат давомида меҳмонлар жамоаларимиз учун Батуми шаҳрида йиғин ташкил қилиш бўйича таклифларини билдиришди. Ўз навбатида, элчи жаноблари бир неча ой муқаддам ЎМЙ учун Тошкентга келган дзюдо бўйича Грузия терма жамоаси илиқ қабул қилингани учун МОҚ мутасаддиларига ташаккур айтиб ўтди. Ташриф давомида меҳмонлар МОҚ музейида бўлиб, ўзбек спортининг бой тарихи билан яқиндан танишишди.