Ҳасанбой Дўсматов укасининг Ўзбекистон чемпионатидан четлатилиши ҳақида гапирди

Ҳасанбой Дўсматов сайтимизга берган интервьюсида укасининг четлатилиши ҳақида фикр билдирди:  

"Мана шу Ўзбекистон чемпионатида укам билан битта вазнда қатнашдим ва иккимиз ҳам финалга етиб келдик. Укам ярим финалда боксда тақиқланган зарбани берган экан. Буни ўзим кўрмагандим. Кейинроқ билдим. Бу ерда икки боксчида ҳам айб бор. Укамни рақиби биринчи орқадан зарба берган, Фарёзбек эса бунга жавоб қайтарган. 

Нима деймиз, бу сафар чемпион бўлолмаган бўлса, кейинги мусобақаларда ғолиб бўлади. У энди 18 ёш. Энг асосийси, чемпионат давомида у рақибларини ютди. Шу тарафдан, кейинги мусобақаларда ўзини кўрсатади деб ўйлайман.

Укамни бу қарор чиқмасидан аввал "сўккандим". Нимага бундай қилдинг, мана шу керакмиди сенга, керак бўлса, сени рингдан чиқарвориши ҳам мумкин эди, деб айтгандим. Айтганимдек, 2-3 кундан кейин мана шу қарор чиқди. Четлатиш ҳақидаги қарор чиққанидан сўнг укам билан ҳали кўришмадим. Унга қаттиқ турганим боис, у мендан қочиб юрибди", - деди Ҳасанбой Дўсматов.