Ҳиндистон шахмат терма жамоаси Самарқандда ташкилий муаммога дуч келди

Жаҳон чемпиони Гукеш, Р. Праггнанандхаа ва жамоанинг бошқа аъзолари Самарқандга етиб келганидан сўнг меҳмонхона хоналарига жойлашиш учун беш соатдан ортиқ вақт кутишга мажбур бўлган.

Ҳиндистон эркаклар терма жамоаси сардори Сринатх Нараянан ҳамда гроссмейстер Видит Гужрати ижтимоий тармоқларда юзага келган вазиятдан норози эканини билдирган. Уларнинг таъкидлашича, жамоа учун амалга оширилган брон маълумотлари меҳмонхонага ўз вақтида етказилмагани сабабли айрим шахматчиларга дастлаб хоналар ажратилмаган.

Кейинчалик Ҳиндистон Шахмат федерацияси аралашуви билан муаммо бартараф этилган ва терма жамоа аъзолари меҳмонхонага жойлаштирилган.

Маълумот учун, Ҳиндистон терма жамоаси Самарқанддаги 46-Бутунжаҳон шахмат Олимпиадасига 2024 йилги ғолиб сифатида ташриф буюрган ва ўз чемпионлик унвонини ҳимоя қилади.