Ҳумоюн Султонов Чин юртидаги турнирда 1/8 финалга чиқди

Ҳамюртимиз Ҳумоюн Султонов саралашнинг ҳар икки учрашувида ATP рейтингида ўзидан сезиларли даражада юқорида бораётган рақибларини мағлубиятга учратиб, асосий тўрга йўлланма олганди. 

Бироз аввал мамлакатимизнинг иккинчи ракеткаси 1/16 финалда асосий тўрга имтиёзли равишда қўйилган хитойлик Аоран Ванги мағлубиятга учратди. Саксон саккиз дақиқа давом этган баҳсда Султонов рейтингнинг 911-поғонасидан жой олган мезбон теннисчидан 6/3, 7/6(4) ҳисобида устун келди. 

Таққослаш учун, Султонов ATP рейтингида 871-ўринни эгаллаб турибди. Ҳар икки теннисчи ҳам бугунги учрашувида бир хилда - 14 тадан эйс зарбасини амалга оширган. Бу теннисчиларнинг ўзаро ўтказган иккинчи учрашуви бўлди. 2019 йилда ўтган илк баҳсда ҳам Ҳумоюннинг қўли баланд келган эди.  

Энди Султонов 1/8 финалда турнирнинг учинчи ракеткаси Сун Фажингга қарши кортга чиқади. Дунёнинг 244-ракеткаси бўлиб турган хитойлик теннисчи бугун 1/16 финалда австралиялик (ATP рейтингидаги ўрни 507) Тай Сачни ортиқча қийинчиликсиз енгди - 6/2, 6/1. Султонов - Фажинг учрашуви бизнинг вақт билан эртага соат 07:00да бошланади.