Ҳумоюн Султонов иштирокидаги ярим финал баҳси муддатидан олдин тўхтатилди

"Челленжер" туркумига кирувчи мусобақанинг мукофот жамғармаси 160 000 АҚШ долларини ташкил қилади. Унда ҳамюртимиз Ҳумоюн Султонов ҳам ўз имкониятини синаб кўрди. Бироз аввал якунига етган 1/2 финал учрашувида у чехиялик Далибор Сврчинага қарши кортга чиқди. 

Биринчи сет тай-брекда 7/6(8) ҳисоби билан Ҳумоюн фойдасига ҳал бўлди. Иккинчи сетда Далибор теннисчимизга биронта ҳам геймни ютиб олиш имконини бермади. Ҳал қилувчи учинчи сетнинг тўртинчи геймидан кейин Султонов баҳсни давом эттира олмаслигини маълум қилди. Унинг асаблари дош бермадими ёки эски жароҳати безовта қилдими, буни номаълум. 

Шу тариқа, Ҳумоюн Султонов турнирдаги иштирокини финал остонасида аламли тарзда тўхтатди. Мамлакатимизнинг биринчи ракеткаси айни пайтда ATP рейтингининг 229, Сврчина эса 219-поғонасидан жой олган. Ҳумоюн ярим финалга қадар рейтингда ўзидан анча юқорида жойлашган рақибларини мағлуб этишни уддалаганди.