Ҳумоюн Султонов Калабурагида 1/2 финал иштирокчисига айланди

Мукофот жамғармаси 25 000 АҚШ долларини ташкил қилувчи турнирда ҳамюртимиз Ҳумоюн Султонов ҳам муваффақиятли одимлаяпти. Мамлакатимизнинг биринчи ракеткаси M25 тоифасига кирувчи ушбу турнирда ҳам биринчи рақам остида сараланган. 

Бироз аввал якунига етган 1/4 финал учрашувида Султонов ортиқча қийинчиликсиз ғалабага эришди. У 77 дақиқа давом этган баҳсда турнирнинг саккизинчи ракеткаси россиялик 19 ёшли Максим Жуковни 6/2, 6/3 ҳисобида таслим этди. 

Таққослаш учун, Султонов ATP рейтингида 230, Жуков эса 738-поғонани банд этган. Бу теннисчиларнинг ўзаро ўтказган илк учрашуви бўлди. Эртага Ҳумоюн финал чиптаси учун ҳиндистонлик Дев Жавияга қарши кортга чиқади. Дев турнирда еттинчи рақам остида таснифланган бўлиб, бугун 1/4 финалда ватандоши Сидҳарт Раватнинг кортга чиқмагани боис, курашсиз ярим финал иштирокчисига айланди.