IBA Халоков - Шумков жанги бўйича якуний қарорни маълум қилди

Ёдингизда бўлса, Абдумалик Халоков иштирокидаги финал жангида рақиб боксчимизнинг қулоғидан тишлаб олганди.

Маълум қилинишича, -60 кг вазн тоифасида бўлиб ўтган Абдумалик Халоков ҳамда Всеволод Шумков ўртасидаги жанг натижаси ўзгармайди. 

Ушбу ҳолат тасодифан бўлди ва жанг натижасига таъсир қилмаган деб топилди.

Рефери ушбу вазиятда яқин турган ва жангни тўхтатишга асос йўқ деб ҳисоблаган. Шунингдек, IBA маълумотида келтирилишича, Халоков жангни одатий тарзда давом эттирган. 

Бундан ташқари, Ўзбекистон терма жамоаси томонидан мазкур вазият бўйича тадбир якунлангунча апелляция берилмаган, дейилади IBA тақдим этган пресс-релизда. 

Шу тариқа, жанг натижаси ўзгармай қолди ва Абдумалик Халоков Жаҳон чемпионатини кумуш медаль билан якунлади. Россиялик Всеволод Шумковнинг олтин медали эса ўзида қолди.