III Ёшлар Осиё ўйинлари. Ўзбекистон 41 та медаль билан 2-ўринни мустаҳкамлаб олди (+тўлиқ жадвал)

Айни дақиқаларга қадар Ўзбекистон терма жамоаси спорт делегацияси медаллар жамғариш бўйича жами 41 та медаль қўлга киритиб улгурди. Ёшларимиз 19 та олтин, 5 та кумуш, 17 та бронза медалига эга чиқишди. Медаллар жамғариш бўйича терма жамоамиз 2-ўринни мустаҳкам эгаллаб турибди. Учинчи ўриндаги Таиланд терма жамоасидан 6 та олтин медаль кўп жамғарганмиз. 

Осиё спорти гегемони Хитой терма жамоасининг умумий медаллари 101 тага етиб улгурди. Чин юрти вакиллари 48 та олтин, 35 та кумуш, 18 та бронза медалига сазовор бўлишди. Ён қўшниларимиз Қозоғистон делегацияси 12 та олтин, 15 та кумуш, 23 та бронза, роппа-роса 50 та медаль билан 4-поғонадан жой олишган. Тожикистон (2 та олтин, 1 та кумуш, 9 та бронза) 18, Қирғиз Республикаси (4 та кумуш, 6 та бронза), 27, Афғонистон (1 та кумуш, 3 та бронза) 30, Туркманистон (1 та бронза) эса 35-ўринни банд этган.       

Умуман олганда, жами 26 давлат делегациялари ҳисобида камида 1 та олтин, 31 тасида битта кумуш, 36 тасида эса бронза медали бор. Мусобақа давом этмоқда.