III Ёшлар Осиё ўйинлари. Ўзбекистон ўз иштирокини 81 та медаль билан 2-ўринда якунлади (+тўлиқ жадвал)

Ўзбекистон спорт делегацияси кеча комплекс мусобақадаги иштирокини якунлаб улгурди. Бугун Ёшлар Осиё ўйинларининг тантанали ёпилиш маросими бўлиб ўтади ва унда навбатдаги мезбон Камбоджага мусобақанинг рамзий байроғи топширилади. Ўзбекистон спорт делегацияси III Ёшлар Осиё ўйинларида тарихий натижа қайд этди. Бундан аввалги мусобақаларда умумий медалларимиз 10 тага ҳам етмаганди. 

Манама спорт ареналарида оз эмас, кўп эмас, умумий ҳисобда 81 та медаль қўлга киритдик. Спортчиларимиз 37 та олтин, 16 та кумуш, 28 та бронза медалига эга чиқишди. Бу борада умумжамоа ҳисобида мустаҳкам 2-ўринни эгалладик. Учинчи поғонадаги Қозоғистон терма жамоаси 24 та олтин, 29 та кумуш, 40 та бронза, жами 93 та медални расмийлаштирди. Медаллар сони бўйича қўшниларимиз биздан устунлик қилишди. Биз эса медаллар сифати бўйича ғолиб бўлдик. 

Кутилганидек, Хитой спорт делегацияси катта фарқ билан биринчи ўринни эгаллади. Чин юрти спортчилари 63 та олтин, 49 та кумуш, 35 та бронза, жами 147 та медаль билан тақдирланишди. Топ-10`таликдан Эрон, Таиланд, Ҳиндистон, Гонконг, БАА, КХДР ва Хитой Тайпейи терма жамоалари жой олди. 

Жами 29 давлат терма жамоалари мусобақанинг камида 1 та олтин, 36 таси бронза медалини қўлга киритди. Қўшниларимиз Тожикистон (2 та олтин, 3 та кумуш, 15 та бронза) 18, Қирғиз Республикаси (1 та олтин, 9 та кумуш, 11 та бронза) 21, Афғонистон (1 та кумуш, 2 та кумуш, 3 та брона) 24, Туркманистон эса (1 та олтин, 1 та кумуш, 4 бронза) 27-ўринни банд этди.