Икки курашчимиз Осиё чемпионати финалида, яна иккиси бронза учун курашади

Бугун эркин кураш бўйича мусобақа бошланди. Бироз аввал саралаш беллашувлари якунланиб, кечки дастурда медаллар учун гиламга чиқадиган курашчилар номи маълум бўлди. Улар орасида Ўзбекистон терма жамоаси аъзолари ҳам бўлади. 

Жумладан, -70 кг вазнда юртимиз шарафини ҳимоя қилаётган Зафарбек Отахонов финалга йўл олди. У аввалига ҳиндистонлик Муляс Ядавни 10-0, 1/4 финалда япониялик Йошиносуке Аоягини 3-1, 1/2 финалда иорданиялик Шамаил Исаковни 10-0 ҳисобида доғда қолдирди. Зафарбекнинг Осиё чемпионлиги учун кечадиган финал беллашувидаги рақиби Санжар Досжанов (Қозоғистон) бўлади. 

Токио-2020 Олимпиадаси бронза медали совриндори Бекзод Абдураҳмонов (-79 кг) 1/4 финалда Шуҳрат Бозоров (Тожикистон)ни 11-0, 1/2 финалда эса Дипак Дипак (Ҳиндистон)ни 10-0 ҳисобида мағлубиятга учратди. Унинг финалдаги рақиби Болат Сакаев (Қозоғистон) бўлади.  

Қолган икки курашчимиз Умиджон Жалолов (-65 кг) ва Махсуд Вейсалов (-97 кг) бронза медали учун гиламга чиқади. Буэнос-Айрес-2018 ўсмирлар Олимпиадаси чемпиони Умиджон Жалолов 1/2 финалда мўғулистонлик Тумур Очир Тулгага 2-5, Вейсалов эса хитойлик Авусайиман Ҳабилага 0-10 ҳисобида ютқазиб қўйди. 

Олтин медаль учун

-70 кг: Зафарбек Отахонов - Санжар Досжанов (Қозоғистон)

-79 кг: Бекзод Абдураҳмонов - Болат Сакаев (Қозоғистон)

Бронза медали учун 

-65 кг: Умиджон Жалолов - Улукбек Жолдошбеков (Қирғизистон)  

-97 кг: Маҳсуд Вейсалов - Дипак Дипак (Ҳиндистон)