Икки шахматчимиз бугун FIDE Жаҳон кубогининг иккинчи босқич тай-брек баҳсида ўйнайди

Ушбу нуфузли мусобақада Ўзбекистон терма жамоасининг уч нафар етакчи вакилалари ҳам баҳс олиб боришмоқда. Шахматчи қизларимиз Жаҳон кубогининг биринчи босқичида рақибаларини мағлуб этишга муваффақ бўлишган эди. Иккинчи даврада табиийки, кучли рақибалар ҳамюртларимизни қарши олишди. 

Гулруҳбегим Тоҳиржонова илк учрашувда хитойлик халқаро спорт устаси Лу Миаойига, ёшлар ўртасида жаҳон чемпиони Афруза Ҳамдамова ҳиндистонлик гроссмейстер, рапид йўналишида икки карра жаҳон чемпиони Ҳампи Конеруга имкониятни бой берган, Умида Омонова эса Европа чемпиони, польшалик Алина Калинская билан дуранг ўйнаган эди.

Тоҳиржонова жавоб партиясида хитойлик рақибасини чиройли тарзда мағлуб этиб, икки ўйин натижасига кўра мувозанатни тиклади. Бугун тай-брекда учинчи давра тақдири ҳал бўлади. Афруза Ҳамдамова жавоб учрашувида номдор рақибаси билан дуранг ўйнади, аммо икки ўйин натижасига кўра Жаҳон кубогидаги иштирокини якунлади. Умида Омонова эса бу сафар ҳам Калинская билан муросага келди. У ҳам бугун тай-брекда ўз омадини синаб кўради.