Икки юнон-рум курашчимиз Жаҳон чемпионати шоҳсупасида + ФОТО

Дунё биринчилигининг иккинчи куни юнон-рум кураши бўйича қолган вазн тоифаларида ғолиб ва совриндорлар маълум бўлди. Уч юнон-рум курашчимиз бронза медали учун гиламга чиқди ва улардан икки нафари рақибларини енгиб, жаҳон чемпионати совриндорига айланди. 

Ҳожиакбар Қўчқоров (55 кг) молдовалик Максим Сармановни 9-1, Беҳрузбек Алиев (72 кг) эса арманистонлик Гор Хачатрянни сўнгги балл (7-7) эвазига таслим этди. 97 кг вазндаги Фахрикамол Комилжонов ўтиш беллашувида япониялик Рёсей Катамтсуни 9-1 ҳисобида доғда қолдирди. Аммо бронза медали учун бўлиб ўтган баҳсда финляндиялик рақиби Паули Перкюга ютқазиб қўйди. 

Шу тариқа, юнон-рум кураши бўйича Ўзбекистон U20 терма жамоаси жаҳон чемпионатидаги иштирокини 1 та олтин, 2 та бронза медали билан якунлади. 63 кг вазн тоифасида юртимиз шарафини ҳимоя қилган Қувончбек Исмоилов биринчи кунги беллашувларда жаҳон чемпионига айланганди. Ҳамюртимиз ҳал қилувчи финал баҳсида россиялик Салим Кармаховни 9:7 ҳисобида мағлубиятга учратган эди. Исмоилов финалга қадар хитойлик Жаожиан Вангни 14:5, финляндиялик Матиас Арпяненни 9:8, озарбайжонлик Турал Аҳмадовни 3:2, эквадорлик Велиз Карраседони 3:2 ҳисобида таслим этди. 

Кеча шунингдек, аёллар кураши бўйича ҳам баҳслар бошланди. Ўзбекистон терма жамоасининг икки вакиласи Нилуфар Нурмуҳаммадова (50 кг) ва Соҳибжамол Эсбосинова (53 кг) ярим финалга қадар етиб келди ва рақибаларига имкониятни бой берди. Улар бугун кечки финал блокида бронза медали учун гиламга чиқади. Курашчи қизларимизнинг бронза учун баҳсдаги рақибалари ўтиш беллашувларида аниқланади.