Ислам Махачев кейинги жанги муддати ва эҳтимолий рақибни айтди

Агар Жастин Гэтжи Дэн Хукерни мағлуб эта олса, Ислам Махачевнинг кейинги рақиби бўлиши мумкин. Бу ҳақда чемпионнинг ўзи Махачқалъа аэропортида журналистлар билан мулоқотда айтиб ўтди. 

"Менга бу ғоя ёқяпти. Чунки ҳали Жастин билан жанг қилмаганман. Оливейра ва Арманга қарши жанг ўтказганман. Яна эски рақибларга қарши жанг учун тайёргарлик кўриш мен учун катта мотивация бўлмайди. Агар Гэтжи бўлажак жангида ўзини кўрсата олса, кейинги рақибим айнан у бўлиши мумкин", - деди Ислам. 

Шунинг баробарида Махачев кейинги эҳтимолий рақиблари сафидан Арман Царукянни ўчирди. Арман икки ҳафта олдин жангга бир кун қолганида белидаги жароҳат сабаб ўз имкониятини йўққа чиқарганди. 

"Царукян аниқ кейинги рақибим бўлмайди. Буни Дана Уайт ҳам ўз интервьюсида айтди. Арман ўзига берилган имкониятдан "фойдаланиб" бўлди", - дея фикрини давом эттирди Махачев.  

Бундан ташқари, UFC чемпиони қачон октагонга қайтишни режалаштираётгани ҳақида берилган саволга жавоб берди.

"Катта эҳтимол билан июль ойида Халқаро жанглар ҳафталиги бўлади. Агар UFC таклиф қилса, мен июлга тайёр бўламан", - дея сўзларига якун ясади чемпион. 

Маълумот учун, Жастин Гэтжи ва Дэн Хукер ўртасидаги жанг 8 март куни Лас-Вегасда ташкил этиладиган UFC 313 турнири доирасида бўлиб ўтади.