19 июн 23:28
Янгиликлар

Теннис

Истомин Илкелдаги биринчи ва охирги учрашувини ўтказди

Буюк Британиянинг Илкел шаҳрида теннис бўйича “Челленжер” туркумига кирувчи турнир давом этмоқда.

Соврин жамғармаси 137 560 еврони ташкил қилувчи ушбу мусобақада мамлакатимизнинг биринчи ракеткаси Денис Истомин ҳам иштирок этди. Ҳамюртимиз турнирда тўртинчи рақам остида сараланган бўлиб, ўз иштирокини тўғридан-тўғри иккинчи босқичда бошлади.

Афсуски, Истомин уч сет давом этган иккинчи давра учрашувида чехиялик Лукаш Росолга имкониятни бой бериб қўйди. Биринчи сетда Росол 6:3 ҳисобида зафар қучди. Иккинчи сетда Истомин мувозанатни тиклади - 6:4. Ҳал қилувчи учинчи сетда эса Лукаш 6:4 ҳисобида зафар қучиб, чорак финалга йўл олди.

Таққослаш учун, Росол ATP рейтингида 137, Истомин эса 105-ўринни эгаллаб турибди. Чехиялик теннисчи илк даврада австриялик Себастьян Оффнерни 6/7(8), 6:3, 7/6(2) ҳисобида мағлуб этган эди.