"Жаҳон чемпионатида бутун вужудим билан Ўзбекистонга мухлислик қиламан" - сербиялик собиқ футболчи

Биз эса таниқли футбол мутахассислари, собиқ футболчилар билан фикрлар алмашишда давом этамиз. Ўз вақтида "Пахтакор" сафида ажойиб ўйинлари билан эътироф қозонган Боян Миладинович Ўзбекистон терма жамоаси ҳақида гапирди.

“Ўзбекистон терма жамоасини тарихда илк бор Жаҳон чемпионати йўлланмасини қўлга киритгани билан чин қалбдан табриклайман. Бутун ўзбек халқи учун бу улкан ғурур ва фахрдир. Менинг фикримча, "оқ бўрилар" мазкур турнирнинг ҳақиқий кашфиётига айлана олади. Мусобақа жуда қийин ўтиши аниқ, бироқ Ўзбекистон терма жамоаси футболчилари ўз маҳоратларини кўрсатиб, гуруҳдан чиқа олишларига ишонаман.

Фабио Каннаварони дунё футболида ҳамма яхши танийди. У ўз вақтида юқори савияда тўп тепгани боис, бугунги кунда қўлостидаги шогирдларинижуда яхши тушунади ва бой тажрибасидан келиб чиқиб тайёрлаяпти. Йигитлар ватан шаънини халқаро майдонда муносиб ҳимоя қила олишади дея оламан.

Сўзим якунида барча ўзбек халқини Қурбон ҳайити билан муборакбод этаман. Ўзбекистон терма жамоасининг ғалабалари учун ҳамиша дуодаман.

Дебютант жамоа учун энг муҳими — мамлакат нуфузини муносиб ҳимоя қилиш. Ҳеч нарсадан қўрқмаслик керак, чунки Ўзбекистон терма жамоаси футболчилари энг яхшиларидандир. Йигитлар майдонда бутун борлиғини бериб ўйнашлари талаб этилади. Ушбу мусобақада ўзбек футболининг ҳақиқий маҳоратини кўрсатиш зарур. Ҳаммаси яхши бўлишига умид қиламан. ЎФА биринчи вице-президенти Равшан Эрматов ва вице-президент Одил Аҳмедов футболчиларга нима дейиш ва уларни қандай руҳлантиришни жуда яхши билишади. Бу галги мундиалда Сербия қатнашмаётгани боис, бутун вужудим билан Ўзбекистонга мухлислик қиламан. Жамоа билан бирга ғалабада қувонаман, мағлубиятда куяман. Ишонаман, йигитлар мухлисларни хурсанд қила олишади”, – деди Миладинович.