Жанубий Корея элчиси ЎзДЖТСУга 50 миллион сўмдан ортиқ спорт анжомлари совға қилди

Даставвал элчи жаноблари университетда талабаларга яратилган шароитлар билан таништирилди. Шундан сўнг университет ректори Маҳмуд Болтабаев ва меҳмонлар билан учрашув бўлиб ўтди.

Учрашувда икки мамлакат ўртасидаги жисмоний тарбия ва спорт соҳасидаги ҳамкорликнинг ҳозирги ҳолати, олий таълим муассасаларининг ўрни, ўқитувчилар ҳамда талабалар алмашинуви хусусида сўз юритилди. Ҳамкорлик кўлами бўйича таклиф-мулоҳазалар билдирилди ҳамда уни кенгайтириш имкониятлари муҳокама қилинди.

Шунингдек, учрашувда меҳмонларга Ўзбекистон давлат жисмоний тарбия ва спорт университетида амалга оширилаётган қурилиш-таъмирлаш ишлари бўйича тақдимот қилинди.

Учрашув якунида меҳмонларга эсталик совғалари топширилди. Ўз ўрнида элчи жаноблари Кан Же Квон таэквондо таълим йўналиши талабалари учун университетга қиймати 50 миллион сўмдан ортиқ бўлган добок, протектор, митта ва бошқа спорт анжомларини совға қилди.

Маълумот учун: 2008 йилдан буён университетида таэквондо таълим йўналишига талабалар қабул қилинмоқда. Шу йиллар давомида мазкур йўналиш бўйича 352 нафар олий маълумотли мутахассислар етишиб чиқди ва ҳозирда улар республикамизнинг турли вилоятларида ўз фаолиятларини муваффақиятли давом эттиришяпти. Ҳозирги кунда таэквондо таълим йўналишида 310 нафардан ортиқ талаба ёшлар таҳсил олишмоқда.

Таэквондо мутахассислигини тугатган талабалар орасидан Акмал Эргашев, Евгения Каримова, Ирина Диргач, Жасур Бойқўзиев ҳамда Никита Рафалович сингари халқаро тоифадаги спорт усталари, жаҳон чемпионати совриндорлари ва Осиё ўйинлари ғолиблари етишиб чиққан.

Шунингдек, университетда бир неча йиллардан буён Жанубий кореялик профессор Баэк Мун Жонг талабаларга таэквондо спорти сир-асрорларини ўргатиб келмоқда.