Жиззахда белбоғли кураш бўйича жаҳон чемпионати ўтказилади

Мамлакатимиз жаҳоннинг энг сара полвонларини кураш гиламига чорлайди. Тўрт кун мобайнида дунёнинг энг кучли полвонларини ғолиблик учун беллашади. Белбоғли кураш қоидаларига кўра, мазкур жаҳон чемпионатида ўғил болалар белбоғли кураш ва эркин йўналишларида 52, 62, 68, 75, 82, 90, 100, +100 кг. вазн тоифасида, қизлар белбоғли кураш ва эркин йўналишларда 48, 52, 58, 66, 76, +76 кг. вазн тоифаларида  куч синашишади. 

Ўзбекистон Республикаси  Президенти соврини учун Жаҳон чемпионатида биринчи ўринни қўлга киритган спортчи 10 миллион сўм, иккинчи ўринни қўлга киритган спортчи 7 миллион сўм ва учинчи ўринни қўлга киритган спортчи 5 миллион сўм пул мукофотига эга бўлади.

Белбоғли кураш бўйича жаҳон чемпионати Ўзбекистон Республикаси Туризм ва спорт вазирлиги, Ўзбекистон миллий олимпия қўмитаси, Жиззах вилояти ҳокимлиги, Жаҳон белбоғли кураш ассоциацияси (ЖБКА), Халқаро белбоғли кураш федерацияси (IBWA), Ўзбекистон белбоғли кураш федерацияси ҳамда қатор вазирлик ва ташкилотлар кўмагида ўтказилади. 

Ўзбекистон Республикаси Президенти соврини учун 2001-2003 йилларда туғилган йигит-қизлар ўртасидаги жаҳон чемпионатида 30 дан ортиқ давлатлардан терма жамоаларнинг ташриф буюриши кутилмоқда.

Айни пайтда Жиззах шаҳрида жаҳон чемпионати муносиб тарзда ўтиши учун қизғин тайёргарлик ишлари олиб борилмоқда. 

Илҳом РАҲМОНОВ тайёрлади