Жиззахда белбоғли кураш бўйича Осиё чемпионати бошланди ФОТОГАЛЕРЕЯ

Ўзбекистон Республикаси ёшлар сиёсати ва спорт вазирлиги, Жиззах вилоят хокимлиги, Жиззах вилояти прократураси, Осиё белбоғли кураш  конфедрацияси, Ўзбекистон белбоғли кураш федерацияси ва қатор ташкилотлар ҳамкорлигида юқори савияда ўтказилаётган ушбу Осиё  чемпионатида Ўзбекистон, Япония, Эрон, Ҳиндистон, Индонезия, Қозоғистон, Қирғизистон, Туркманистон каби 12 та давлатдан келган полвонлар куч синашмоқда.

Чемпионат доирасида Жиззах шаҳридаги "Ўзбекистон" меҳмонасининг анжуманлар залида матбуот анжумани ташкил этилди. 

Унда Осиё белбоғли кураш конфедрацияси президенти Мўминхўжа Муратов (Ўзбекистон), Ўзбекистон белбоғли кураш федерацияси раиси Равшан Дастиров, Алыш халқаро федерацияси президенти Адилет Баяман улу (Қирғизистон), Қазақ куреси ассоциацияси бош директори Естек Ерлан Жумабекули (Қозоғистон), Жиззах вилояти ёшлар сиёсати ва спорт бош бошқармаси бошлиғи Жалолиддин Ўктамов ҳамда оммавий ахборот воситалари ходимлари иштирок этишди. 

Матбуот анжуманида Осиёда белбоғли  курашни, хусусан, белбоғли кураш спорт турларини кенг ривожлантириш, ўзаро ҳамкорлик алоқалари хусусида таъкидланди. Матбуот анжумани якунлангач, куннинг иккинчи ярмида регламентга мувофиқ, қирғиз алыш курашининг классик йўналиши бўйича беллашувлар бошланди. 

Кеча классик йўналишда эркаклар ўртасида 60, 70, 80, 90, 100, +100 кг. вазн тоифасида, аёллар ўртасида эса 55, 60, 65, 70, 75, +75 кг.вазнда тоифаларида 200 нафарга яқин спортчилар ўртасида ғолиблар аниқланди.

Бугун қирғиз алыш курашанинг эркин йўналишида беллашувлар ўтказилётган бўлса, эртага белбоғли кураш бўйича полвонлар Осиё чемпионлиги учун  беллашишади. 25 май  куни эса қазақ куреси бўйича Осиё чемпионати бўлиб ўтади. 

Шунингдек, кечаги алыш кураш бўйича Осиё чемпионатининг тантанали очилиш маросими ҳам ташкил этилди.

Илҳом РАҲМОНОВ тайёрлади