Жиззахда волейбол бўйича ХХVII Ўзбекистон чемпионати бўлиб ўтмоқда

Баҳсларга Жиззах шаҳридаги “Истиқлол” универсал спорт мажмуаси мезбонлик қилаяпти.

3 октябрга қадар бўлиб ўтадиган ушбу мусобақада республикамизнинг Андижон, Бухоро, Хоразм, Наманган, Жиззах ва Тошкент вилоятлари ҳамда Қорақалпоғистон Республикасидан жами 8 та жамоа иштирок этмоқда. Маълум сабабларга кўра (коронавирус сабабли) 4та жамоа мусобақага етиб келолмади.

Дастлабки учрашувда Бухоро вилоятининг “Ёшлик” жамоаси Тошкент вилоятининг “СКУФ” (Университет жамоаси спорт клуби) билан ўзаро баҳс олиб борди. Якунда Тошкент вилояти спортчилари рақибларидан ҳар жабҳада устун эканликларини намойиш этиб, 3-0 ҳисобида ғалаба қозонишди.

Шундан сўнг Хоразм вилоятининг “Урганч ОЗК” жамоаси Андижон вилоятининг “Бўстон” жамоасига қарши бахс олиб борди. Бу ўйинда ҳам 3-0 ҳисобида Андижон вилояти жамоасининг қўли баланд келди.

Шунингдек, мусобақада Қарақалпоғистон Республикасининг “НДПИ” (Нукус давлат педагогика институти), Жиззах вилоятининг “ЖДПИ” (Жиззах давлат педагогика институти), “Жиззах” ҳамда Наманган вилоятининг “НамДУ” (Наманган давлат университети) жамоалари ҳам ғолиблик учун баҳс олиб боришмоқда.