18 май 15:39
Янгиликлар

Теннис

Жокович Рим "Мастерс" турнири ярим финалига чиқди

Италия пойтахти Рим шаҳрида ўтказилаётган "Мастерс" сериясига кирувчи нуфузли турнир ўзининг ҳал қилувчи палласига кирди.

Дунёнинг биринчи ракеткаси Новак Жокович Internazionali BNL d'Italia мусобақасининг ярим финал чиптасини қўлга киритди. Сербиялик теннисчи чорак финал баҳсида рейтингнинг тўққизинчи поғонасида бораётган аргентиналик Хуан Мартин Дель Потрога қарши кортга чиқди.

Уч соату 1 дақиқа давом этган баҳс якунида Жокович рақибидан устун келди - 4/6, 7/6(6), 6/4. Икки теннисчи ўртасидаги ўзаро учрашувлар ҳисоби янада йириклашди - 16:4! Энди Новак ярим финалда яна бир аргентиналик теннисчи Диего Шварцман билан ҳисоб-китоб қилади.