Жошуанинг промоутери: Уайлдер бўлмаса, Поветкин!

Агар британиялик боксчининг жамоаси WBC чемпиони америкалик Деонтей Уайлдер билан келиша олмаса, у ҳолда WBA камарига расмий даъвогар россиялик Александр Поветкинга қарши ҳимоя жангини ўтказади. Бу маълумотни Жошуанинг промоутери Эдди Хирн ҳам тасдиқлади. 

“Александр Поветкиннинг жамоаси билан музокара давом этяпти. Россиялик боксчи расмий даъвогар. Лекин биз биринчи навбатда Уайлдер билан жанг ташкил қилишни мақсад қилганмиз. Агар Деонтей бу жангга розилик бермаса, у ҳолда Жошуанинг кейинги рақиби аниқ Поветкин бўлади”, — деди Хирн The Telegraph нашрига берган интервьюсида. 

Хирннинг сўзларига кўра, Жошуа ҳар қандай ҳолатда ҳам навбатдаги жангини Буюк Британия ҳудудида ўтказади. Ҳозирда “Уэмбли” (90 000 томошабин), “Твикенэй” (82 000) ҳамда “Олимпико” (60 000) стадионлари варианти жанг манзили сифатида кўриб чиқиляпти.