Камбосос: "Ломаченко билан жанг Хэйнига қараганда аҳамиятлироқ эди"

Енгил вазн тоифасида мутлақ жаҳон чемпиони Жорж Камбосос кейинги рақибини танлаш тафсилотлари ҳақида гапирди. Австралиялик боксчининг сўзларига кўра, бу жангга икки номзод — Василий Ломаченко ва Девин Хэйнини кўриб чиққан.

"Ломаченко ва Хэйни биргаликда менинг мақсадларим сирасига кирарди. Менда ҳар доим Девин Хэйни ёки Василий Ломаченко билан шундай позиция юзага келган. Бизнес — бу бизнес, шахсий иш эмас. Мен бирор кишини бошқасидан афзал кўрмадим. Имконим бўлганида, ҳар иккиси билан бир кечада жанг қилган бўлардим".

Камбосос Ломаченко билан жанг қилишни хоҳлаганини тан олди.

"ESPN билан битим, Лу Дибелла билан келишув ва унинг сўровларини ўйлаб кўрадиган бўлсак, Ломаченко билан жанг янада аҳамиятлироқ эди. Ўн йил давомида қаттиқ меҳнат қилдим, қийин йўлни танладим, бутун дунёни кўрдим. Кам пул ишлаб топдим, умуман пул топмадим десам ҳам бўлади. Аксинча. бокс чўққисига чиқиш учун пул йўқотдим".

Шунингдек, Жорж Теофимо Лопесни мағлубиятга учратгани келажаги учун муҳимлигини таъкидлади.

"Дивизиондаги энг яхши боксчини ютдим, туғилган шаҳрида чемпионлик камарини тортиб олдим. Шундай экан, ўз сўровимни беришга, буни ўзим ҳал қилишга лойиқман", - деди Камбосос FightHype You Tube каналига берган интервьюсида.

Маълумот ўрнида, Камбосос навбатдаги жангини Хэйнига қарши ўтказади. Боксчилар июнь ойида жанг қиладилар.