Камилла Раҳимова 2026 йилги теннис мавсумини ғалаба билан бошлади

Аввалроқ, 2026 йилнинг илк WTA турнирида мамлакатимизнинг иккинчи ракеткаси Мария Тимофеева ҳам муваффақиятли старт олгани ҳақида хабар берган эдик. Камилла Раҳимова ҳам ушбу мусобақанинг саралаш баҳсларида финалга йўл олди. Вакиламиз 1/2 финалда австралиялик Астра Шармани ортиқча қийинчиликсиз мағлубиятга учратди - 6/2, 6/2. 

Таққослаш учун, Раҳимова WTA рейтингида 97, Шарма эса 160-ўринни эгаллаб турибди. Олтмиш тўққиз дақиқа давом этган баҳсда мезбон теннисчи 4 та эйс зарбасини амалга оширган, Камиллада бу борада эйс йўқ. Бу теннисчиларнинг ўзаро ўтказган тўртинчи учрашуви бўлди. Ҳисоб теннисчимиз фойдасига - 3:1. 

Энди турнирда саккизинчи рақам остида таснифланган Раҳимова асосий тўрга йўлланма берувчи саралашнинг финал баҳсида учинчи ракетка, словакиялик Ребекка Шрамковага қарши кортга чиқади. Теннисчиларимиз иштирокидаги финал учрашувлари бизнинг вақт билан эртага тонг саҳар соат 5:00да бошланади.