Чунки бу гал Париж кортларида Ўзбекистон байроғи остида иштирок этаётган асосий фигуралардан бири — Камилла Раҳимова. Сўнгги ойларда спорт фуқаролигини Ўзбекистонга ўзгартирган теннисчи нафақат мамлакат тенниси нуфузини ошириши, балки ўзбек теннисининг “Катта дубулға” мусобақаларидаги тарихини янги босқичга олиб чиқиши мумкин.

Камилла Раҳимова ҳозирги кунда WTA рейтингида топ-100 атрофида ҳаракат қилаётган тажрибали теннисчилардан бири саналади. Унинг "Ролан Гаррос"даги энг яхши натижаси — 2023 йилга тўғри келади. Ўшанда у учинчи босқичгача етиб борган эди. Шу жиҳатдан қараганда, Париж грунти унга мутлақо бегона дейиш, тўғри бўлмаса керак.

2026 йилги мусобақа олдидан Камилла асосий тўрга киритилган теннисчилар рўйхатидан жой олди. Турнирнинг илк босқичида эса у румин теннисчиси Жаклин Кристианга қарши баҳс олиб боради. Бу ўйин ўзбекистонлик мухлислар учун катта қизиқиш уйғотиши табиий.

Камилла Раҳимованинг имкониятлари қандай?

Грунт қопламасидаги ўйин услуби Камилла учун муайян устунлик беради. У чизиқларда барқарор ҳаракат қила оладиган, қарши ҳужумга тез ўтадиган теннисчилар тоифасига киради. Айниқса, икки қўлли "бэкхенд" зарбалари ва тўпни қабул қилишдаги фаоллиги рақибларга қийинчилик туғдиради.

Бироқ “Ролан Гаррос” — жисмоний ва руҳий жиҳатдан энг оғир турнирлардан бири. Париж грунтида ҳар бир очко учун курашиш талаб қилинади. Раҳимованинг 2026 йилги натижалари ҳозирча бироз беқарор кечмоқда. ITF статистикасига кўра, унинг жорий мавсумдаги грунтдаги ғалаба фоизи юқори эмас. Шунинг учун мусобақадаги муваффақият кўп жиҳатдан психологик тайёргарлик ва стартдаги ўйинларига боғлиқ бўлади.

Шу билан бирга, Камилланинг халқаро тажрибаси Ўзбекистон тенниси учун катта ютуқ ҳисобланади. Чунки мамлакат аёллар теннисида сўнгги йилларда “Катта дубулға” турнирларида мунтазам юқори босқичларга чиқадиган спортчилар етишмай келаётган эди.

Ўзбекистонлик теннисчилар ва “Ролан Гаррос” тарихи

Ўзбекистон тенниси тарихи “Ролан Гаррос” билан боғлиқ қизиқарли саҳифаларга эга. Мамлакат мустақилликка эришганидан кейин бир қатор теннисчилар Париж кортларида муносиб иштирок этган.

Энг ёрқин номлардан бири — Денис Истомин. Истомин “Катта дубулға” турнирларида Ўзбекистоннинг асосий вакили бўлиб келди ва “Ролан Гаррос”да бир неча бор асосий тўрда қатнашди. Унинг тажрибаси ўзбек тенниси халқаро майдонда рақобат қила олишини кўрсатган эди.

Аёллар теннисида эса сўнгги йилларда Оқгул Омонмуродова, Нигина Абдураимова каби спортчилар Франция очиқ чемпионатида иштирок этиб, Ўзбекистон байроғини ҳимоя қилди. Айниқса, Омонмуродованинг жуфтлик баҳсларидаги иштироки бир вақтлар мамлакат теннисининг муҳим брендига айлангани барчанинг ёдида.

Сўнгги йилларда эса ўзбек теннисида маълум бир танаффус юзага келди. Янги авлод теннисчилари ҳали барқарор равишда WTA ва ATP турларида юқори ўринлар учун кураша олмаётган бир пайтда, Камилла Раҳимованинг Ўзбекистон шарафини ҳимоя қилиш қарорини ижобий баҳолаш жоиз.

Янги давр бошланишими?

Камилла Раҳимованинг Ўзбекистонга ўтишига шунчаки бир теннисчининг фуқаролик алмаштириши сифатида қарамаслик зарур. Бу мамлакат теннисининг халқаро имижи учун ҳам муҳим қадам бўлиши мумкин.

Чунки ҳозирги замонавий теннисда юқори рейтингли спортчиларнинг мавжудлиги нафақат спорт натижалари, балки ёш авлод қизиқиши, ҳомийлар эътибори ва инфратузилма ривожига ҳам таъсир кўрсатади. Агар Камилла “Ролан Гаррос-2026”да муваффақиятли иштирок этса, бу Ўзбекистон тенниси тарихида янги саҳифа очиши эҳтимолдан ҳоли эмас.

Париждаги турнир эса бу саволга жавоб беради: Камилла Раҳимова ўзбек теннисининг янги етакчисига айлана оладими ёки йўқ?

Бу саволга дастлабки жавобни бугун Кристиан Жаклинга қарши баҳсдан сўнг билиб оламиз. Ўйин 19:30 да бошланиши белгиланган. Омад, Раҳимова!