29 мар 13:36
Янгиликлар

Теннис

Катя Александрова Miami Open финалига чиқа олмади

Сайёрамизнинг 16-ракеткаси Екатерина Александрова Майамида ўтказилаётган WTA 1000 тоифасига кирувчи турнирнинг финал остонасида тўхтатилди.

Россиялик теннис маликаси 75 дақиқа давом этган 1/2 финалда WTA рейтингида 53-поғонадан жой олган америкалик Даниэла Коллинзга 3:6, 2:6 ҳисобида имкониятни бой бериб қўйди. Александрова 1, Коллинз 4 та эйс зарбасини амалга оширган.

Энди Коллинз эртага мусобақа бош соврини учун дунёнинг тўртинчи ракеткаси, қозоғистонлик Елена Рибакинага қарши кортга чиқади. Рибакина мукофот жамғармаси 8 миллион 995 минг 555 АҚШ долларини ташкил этувчи ушбу турнирнинг амалдаги вице-чемпиони ҳисобланади. У ўтган йилги финалда чехиялик Петра Квитовага ютқазиб қўйганди - 6:7, 2:6.