Кудерметова финалда! У бу сафар ҳам рейтингда ўзидан юқоридаги рақибасини енгди

Канберра шаҳрида ўтказилаётган WTA 125 тоифасига кирувчи турнирда муваффақиятли одимлаётган теннис маликамиз бироз аввал якунига етган 1/2 финал учрашувида ғалабага эришди. 22 яшар Полинага финал чиптаси учун кечган баҳсда япониялик 24 ёшли Химено Сакатсуме рақиблик қилди. 

Олтмиш тўрт дақиқа давом этган учрашувда Кудерметова рейтингда ўзидан юқорида бораётган рақибасини 7/5, 6/2 ҳисобида мағлубиятга учратди. Бу теннисчиларнинг ўзаро ўтказган илк учрашуви бўлди. Бугунги учрашувда Полина 7, Химено 3 та эйс зарбасини амалга оширган. Қўшхатолар бўйича теннисчимиз "устунлик" қилди - 6 га 4.  

Маълумот учун, Полина Кудерметова айни пайтда WTA рейтингида 167, Химено Сакатсуме эса 151-ўринни эгаллаб турибди. Турнирда учинчи рақам остида таснифланган теннисчимизнинг бош соврин учун кечадиган финалдаги рақибаси Жоанна Гарланд бўлади. 24 ёшли Хитой Тайпейи вакиласи бугун 1/2 финалда украиналик Дарья Снигурни 7/6(3), 6/3 ҳисобида мағлуб этди.