Кудерметова Ўзбекистон номидан илк учрашувини ўтказди

У бугун тонгда Канберра шаҳрида ўтказилаётган WTA 125 тоифасига кирувчи турнирнинг 1/16 финал босқичида ғалабага эришди. 22 яшар Полинага асосий тўрнинг илк босқичида россиялик 18 ёшли Алина Корнеева рақиблик қилди. 

Олтмиш беш дақиқа давом этган учрашувда Кудерметова ортиқча қийинчиликсиз ғалаба қозонди - 6/2, 6/3. Бу теннисчиларнинг ўзаро илк учрашуви бўлди. Алина 3, Полина эса 2 та эйс зарбасини амалга оширган. Қўшхатолар Корнеевада 4 карра кўпроқ бўлди - 8 га 2.  

Маълумот учун, Кудерметова айни пайтда WTA рейтингида 167, Корнеева эса 210-ўринни эгаллаб турибди. Бу Полина учун Ўзбекистон номидан ўтказган илк ўйини бўлгани билан ҳам аҳамиятлидир.