Кураш бўйича XV Жаҳон чемпионатининг янги мезбони эълон қилинди

Бироқ мамлакатда юзага келган сиёсий вазият сабаб мусобақа қолдирилди. Энди мазкур нуфузли чемпионатга Қозоғистон Республикасининг пойтахти Остона шаҳри мезбонлик қилади.

Кеча Қозоғистон Республикаси Туризм ва спорт вазирлигида мазкур нуфузли мусобақани юқори савияда ташкил этиш масалаларига бағишланган учрашув бўлиб ўтди. Унда Қозоғистон Республикаси Туризм ва спорт вазири Ербол Мирзабосинов, Халқаро Кураш ассоциацияси Вице-президенти Зиёвиддин Хожиниязов, IKA Администрацияси раҳбари Мансур Мирзаев ҳамда Қозоғистон Кураш федерацияси президенти Андрей Боргенц иштирок этди.

Учрашув давомида вазир Ербол Мирзабосинов Кураш бугунги кунда жаҳон миқёсида жадал ривожланаётган замонавий спорт турларидан бирига айланганини таъкидлаб, Қозоғистон ушбу чемпионатни энг юқори даражада ўтказиш учун барча имконият ва инфратузилмага эга эканини қайд этди.

Ўз навбатида, Халқаро Кураш ассоциацияси Вице-президенти Зиёвиддин Ходжиниязов Қозоғистон спортчилари халқаро майдонларда юқори натижаларга эришаётганини алоҳида эътироф этиб, бу мамлакатда спорт соҳасида олиб борилаётган тизимли ва изчил ислоҳотлар самараси эканини таъкидлади.

Кураш бўйича катталар ўртасидаги XV Жаҳон чемпионати жорий йил июнь ойи охирида Остона шаҳрида бўлиб ўтади. Мусобақани юқори савияда ташкил этиш мақсадида тегишли ташкилий қўмита тузилиб, тайёргарлик ишлари бошлаб юборилди.