La Bisbal D'Emporda. Биринчи ракеткамизда кутилмаган натижа

Мукофот жамғармаси 115 000 долларни ташкил этувчи турнирда ҳамюртимиз Камилла Раҳимова ҳам ўз омадини синаб кўрди. Афсуски, мамлакатимизнинг биринчи ракеткаси илк даврадаёқ мағлубият аламини тотиб кўрди. Раҳимова россиялик 20 яшар Елена Приданкинага кутилмаганда 4/6, 3/6 ҳисобида имкониятни бой бериб қўйди. 

Таққослаш учун, Приданкина WTA рейтингида 229, Раҳимова 73-ўринни эгаллаб турибди. Бу теннисчиларнинг ўзаро ўтказган иккинчи учрашуви бўлди - 1:1. 2024 йил 30 октябрь куни Хитой турниридаги илк баҳсда Камилла уч сет натижасига кўра зафар қучган эди. Бугунги қарама-қаршиликда Приданкина 2, Раҳимова 1 та эйс зарбасини амалга оширди. Қўшхатолар Еленада уч баробар кўпроқ бўлди - 9 га 3.