Madrid Open. Надаль 16 ёшли теннисчига биттагина гейм берди

Узоқ муддатли танаффусдан сўнг теннис афсоонаси Рафаэль Надаль айнан ўз ватанидаги "Мастерс"да яна кортга қайтди. У илк давра  учрашувида америкалик 16 ёшли Дарвин Бланчга қарши баҳс олиб бориб, ўзидан 21 ёшга кичик рақибига имконият қолдирмади - 6/1, 6/0. 

Таққослаш учун, Рафаэль Надаль айни пайтда ATP рейтингида 512, Бланча эса 1028-ўринни эгаллаб турибди. Бу икки авлод теннисчиларининг ўзаро ўтказган илк учрашуви эди. Олтмиш беш дақиқа давом этган баҳсда иккала теннисчи ҳам иккитадан эйс зарбасини амалга оширган. Надаль 5 та брейк эвазига енгил ғалабани тантана қилди. 

Энди Рафа Mutua Madrid Open турнирининг иккинчи босқичида австралиялик Алекс Де Минаурга қарши кортга чиқади. Қизиғи, Надаль ўтган ҳафта Барселона турнирида айнан Минаурга ютқазиб қўйганди.