Мадримовга рақиблик қилиши мумкин бўлган Жермелл Чарло Цзю билан келишиб олди

Бу ҳақида Boxing Scene нашри хабар бермоқда. Аввалроқ, Цзю даъвогарлик қилувчи Бутунжаҳон бокс ташкилоти (WBO) ҳар икки томонни 20 июнгача жанг учун ўзаро келишиб олишга чақирган эди.

Маълумот учун, 32 ёшли Чарло сўнгги жангини май ойида аргентиналик Брайан Кастаньога қарши ўтказиб, рақибини 10-раундда нокаутга учратган эди. Ушбу жанг орқали Чарло WBC, WBA, IBF ва WBO камарларини бирлаштирганди. Кастаньо учун эса бу фаолиятидаги илк мағлубият эди.

27 ёшли Цзю эса сўнгги бор март ойида Террелла Гушга қарши рингга кўтарилиб, очколар эвазига ғалаба қозонган.

Эслатиб ўтамиз, ҳамюртимиз Исроил Мадримов ҳам ҳозирда ушбу вазнда ҳаракат қиляпти. Агар реванш жангида Мадримов Сорони мағлуб этса, Жермелл Чарлонинг WBA камарига мажбурий даъвогарга айланади. 

Яқиндагина унинг Мишель Сорога қарши реванш жанги расман тасдиқлангани, ушбу жанг юлдузлар иштирокидаги карддан ўрин олгани ҳақида хабар берган эдик.