25 апр 07:22
Янгиликлар

Теннис

Мария Тимофеева Швейцария турнири 1/2 финалида!

Мамлакатимизнинг учинчи ракеткаси Мария Тимофеева ўзи биринчи рақам остида таснифланган турнирнинг бош совринига яқинлашмоқда.

Вакиламиз Швейцариянинг Кьяссо шаҳри мезбонлик қилаётган WTA 75 тоифасига кирувчи, мукофот жамғармаси 60 минг долларни ташкил этувчи турнирнинг ярим финал иштирокчисига айланди. У 1/4 финалда турнирнинг олтинчи ракеткаси, швейцариялик Сусан Бандеччини икки сет натижасига кўра мағлубиятга учратди - 6/1, 6/4.

Таққослаш учун, Тимофеева айни пайтда WTA рейтингида 154, Бандеччи 213-ўринни эгаллаб турибди. Баҳс 84 дақиқа давом этган. Бу теннисчиларнинг ўзаро ўтказган илк учрашуви бўлди. Бугун Мария финал чиптаси учун мусобақада тўртинчи рақам остида таснифланган франциялик Алисе Рамега қарши кортга чиқади. Алисе дунёнинг роппа-роса 200-ракеткаси бўлиб турибди. Ушбу баҳс бизнинг вақт билан соат 17:00да бошланади.