Мавсумнинг илк WTA соврини Қозоғистонга кетадиган бўлди

Ҳал қилувчи финал учрашувида дунёнинг тўртинчи рақамли теннис маликаси, қозоғистонлик Елена Рибакина ҳамда иккинчи ракетка, беларуслик Арина Соболенко ўзаро тўқнаш келишди. WTA 500 тоифасига кирувчи турнир финалида Рибакина рақибасини деярли сезмади - 6/0, 6/3.

Елена бу билан теннисчиларнинг ўзаро учрашувларидаги мағлубият фарқини қисқартирди - 3:5. Роппа-роса 70 дақиқа давом этган финал баҳсида Рибакина 7, Соболенко 3 та эйс зарбасини амалга оширган. Чемпион қўшхатога йўл қўймади. Брейклар 5 га 1 кўринишида қозоғистонлик теннисчи фойдасига. 

Учрашув давомида беларуслик теннисчи шифокорларга мурожаат қилишга мажбур бўлди. У чап оёғининг сон қисмидаги оғриқ сабаб тиббий танаффус олди. 

Brisbane International турниридаги муваффақиятли иштирок Елена Рибакинага 500 рейтинг очкоси ҳамда 220,000 доллар мукофот пули келтирди. У эртага эълон қилинадиган янги рейтингда Топ-3`га қайтади. Бу қозоғистонлик теннисчи учун фаолитиядаги олтинчи WTA соврини бўлди.