Махачев навбатдаги чемпионлик ҳимояси учун рақиб ва муддатни маълум қилди

"Биз Рамазонгача жанг ўтказишимиз шарт, бу юз фоиз! Мен январда ёки шу йилнинг охирида жанг қилишим керак. Мен эндигина йигирма ёшдан сал ошган бола эмас – 34 ёшдаман ва имкон қадар тезроқ жанг қилишим лозим. Мен кўп вазн ташламайман, жиддий жароҳатларим ҳам йўқ. Балки бурунни яна бир бор текширтириш керак бўлар, лекин ҳаммаси жойидага ўхшаяпти", – деди россиялик чемпион Филадельфиядаги UFC 330 турниридан кейинги матбуот анжуманида.

Шунингдек, Махачев ярим ўрта вазн тоифасига ҳали тўлиқ мослашмаганини ва кейинги жанг учун янада каттароқ ва кучлироқ бўлишни режалаштираётганини таъкидлади.

"Оғир жанглар сени янада кучлироқ қилади ва мен ўзимни яхшироқ бўлганимни ҳис қиляпман. Мен ҳали вазн йиғишим, каттароқ ва кучлироқ бўлишим керак, бунинг учун эса вақтим бор. Бу жанг ҳаммага кўрсатдики, жанг қандай бўлишидан қатъи назар — осонми ёки қийин, мен учун бу биринчи сониядан охиргисигача бўлган урушдир", – дея қўшимча қилди UFC чемпиони.

Навбатдаги рақибга келсак, Ислам уни бразилиялик нокаутчи Карлос Пратес деб билади. Пратес чемпионлик жангида шахсан ҳозир бўлган ва чемпионга навбатдаги чақирувни ташлаш ниятида эканини билдирган.

"Агар мендан сўрасангиз, бугунги кунда Шавкат ҳали жанг қилмаяпти, Пратес эса жанг қиляпти ва фаол, шунинг учун балки бу у бўлар. Майкл Моралес ҳам яхши, лекин унинг охирги марта қачон жанг қилганини ҳам эслай олмайман. Шунинг учун, менинг жавобим – бу Карлос Пратес!", – дея сўзларини якунлади Махачев.