МДҲ ўйинлари. Мамлакатимиз спорт делегацияси Қозонга етиб борди

Мусобақа спортнинг 17 та тури бўйича ташкил этилади. Унда минтақанинг 10 та давлатидан 1 500 нафарга яқин спортчи, 400 нафарга яқин ҳакамлар ва 100 нафарга яқин бошқа спорт соҳаси мутахассислари қатнашади. Таъбир жоиз бўлса айтиш керак, «кичик олимпиада» баҳсларида МДҲ мамлакатлари спортчилари 182 та медаллар жамланмаси учун баҳслашади.

Кеча Ўзбекистон спорт делегацияси аъзолари Россияга жўнаб кетишди. Делегация таркибидан Туризм ва спорт вазирлиги ва Миллий Олимпия қўмитаси масъул ходимлари, спортнинг бокс, эркин ва юнон-русм кураши бўйича терма жамоа аъзолари, умумий ҳисобда 70 нафардан ортиқ киши ўрин олганди.

Мамлакатимиз спорт делегациясини кузатиш маросимида Туризм ва спорт вазири ўринбосари Авазжон Каримов ҳам иштирок этди ва спортчиларимизга омад тилади.

Кеча тунда Қозонга етиб борган вакилларимиз мазкур спорт ўйинлари учун барпо этилган Олимпия шаҳарчасига жойлашишди.

Мамлакатимиз спорт делегациясининг иккинчи қисми 3 сентябр куни, якуний қисми эса 6-7-сентябр кунлари Россияга жўнаб кетади.