Мэнни Пакьяонинг навбатдаги жанги ҳақида маълумот берилди

Ярим ўрта вазн тоифасида WBA чемпиони Роландо Ромеро айнан Пакьяога қарши жангда камарини ҳимоя қилиши мумкин. Май ойида Ромеро ҳакамларнинг якдил қарори билан Райан Гарсияни мағлуб этган ва Жаҳон бокс ассоциацияси (WBA ) чемпионлик камарини қўлга киритганди.

Мэнни Пакьяо тўрт йиллик танаффусдан сўнг шу йил июль ойида рингга кўтарилганди. 46 ёшли афсона ярим ўрта вазн тоифасида WBC чемпиони америкалик Марио Барриосга қарши жанг ўтказиб, дуранг натижа қайд этганди. Кўпчилик ўша жангда Пакьяо ғалаба қозонган деб ҳисоблайди. 

Мэнни қўлқопларни михга илиш ҳақида ўйламаяпти. Ҳозир Ромеро "Пэкмен"нинг энг эҳтимолий рақиби ҳисобланади. Ўша оқшом дастурида биринчи ўрта вазн тоифасида WBC чемпиони Себастьян Фундоранинг Кит Турман билан жанги бўлиб ўтиши мумкин. Бу икки боксчи октябрь ойидаёқ жанг қилиши керак эди, аммо спарринг пайтида Фундора қўлидан жароҳат олган ва натижада баҳс кечроқ муддатга қолдирилганди.