Monterrey Open. Тимофеева дунёнинг 53-ракеткасига имкон қолдирмади

Хабар берганимиздек, Monterrey Open — WTA 500 турнирининг саралаш босқичи ҳал қилувчи финал учрашувига Ўзбекистоннинг биринчи хамда иккинчи ракеткалари - Камилла Раҳимова ва Мария Тимофеева етиб келганди. Уларнинг ўзаро учрашувида ғалаба қозонган Мария асосий тўрга йўлланмани қўлга киритган эди. 

Бугун тонг саҳарда Тимофеева 1/16 финал босқичида дунёнинг 53-ракеткаси, хитойлик Шуай Чжанга қарши кортга чиқди. Олтмиш саккиз дақиқа давом этган баҳсда ҳамюртимиз тажрибали рақибасини ортиқча қийинчиксиз мағлубиятга учратди - 6/1, 6/3. 

Бу теннисчиларимизнинг ўзаро ўтказган биринчи учрашуви бўлди. Тимофеева 4 та эйс зарбасини амалга ошириб, 5 та қўшхатога йўл қўйди. Чин юрти вакиласида эйс зарбаси бўлмади. Қўшхатолари эса 3 тани ташкил этди. 

Таққослаш учун, Мария Тимофеева айни пайтда WTA рейтингида 96, Шуай Чжан 53-ўринни эгаллаб турибди. Эртага вакиламиз 1/8 финалда дунёнинг 30-ракеткаси, турнирда бешинчи рақам остида таснифланган америкалик Ли Аннга қарши кортга чиқади.