МОҚ раҳбарияти баскетболчиларимиз билан учрашди + ФОТО

Сир эмас, ўтган йиллар давомида жамоавий спорт турларининг моддий техник базаси талаб даражасида эмас, табиийки натижалар ҳам шунга монанд эди.       

Ҳозирда бу йўналишда ҳам ислоҳотлар олиб борилиб, биринчи навбатда спортчилар учун зарур шарт-шароитларни яратиш, селекция ишларини жадаллаштириш ва табиийки бунинг таъсирида халқаро майдондаги натижаларимизни ижобий томонга ўзгартиришга эътибор қаратилмоқда. Хусусан, олимпия оиласига мансуб баскетбол спорт турида ҳам катта ҳажмдаги ишлар амалга ошириляпти. 

Кеча МОҚ раҳбарияти Мудофаа вазирлигига қарашли МҲСК спорт базасида йиғин ўтказаётган баскетбол бўйича аёллар терма жамоасининг машғулотида бўлиб, улар билан дилдан суҳбатлашдилар.

Унда МОҚ раиси Рустам Шоабдураҳмонов, Ўзбекистон Республикаси Мудофаа вазирининг ўринбосари Алишер Нарбаев, МОҚ раиси ўринбосарлари Азизжон Камилов ҳамда Шерзод Ташматов, Ўзбекистон баскетбол федерацияси мутасаддилари иштирок этишди. Самимий руҳда кечган мулоқот чоғида юртимизда баскетбол спорт турини янги босқичга кўтарилишига хизмат қиладиган муҳим масалалар юзасидан фикр алмашилди.