МОҚ ва “Темурбеклар мактаби”нинг ҳамкорлиги давом этади

Тошкент шаҳрида жойлашган “Темурбеклар мактаби” ўқувчилари орасида спортни оммалаштириш, уларни ҳар томонлама баркамол авлод ва келажакда ҳарбий хизматга жисмонан ва руҳан матонатли ходим  сифатида тарбиялаш мазкур масканнинг асосий мақсадларидан бири. Бу борада Ўзбекистон Республикаси Давлат хавфсизлик хизмати ва Ўзбекистон Миллий Олимпия қўмитаси ўртасида ҳамкорлик битими имзоланган бўлиб, ушбу ҳамкорлик доирасида бир қатор самарали ишлар олиб борилмоқда.

Бугун МОҚ раисининг биринчи ўринбосари Равшан Ирматов Юнусобод туманида жойлашган ушбу мактаб биносида бўлди. Ташриф давомида МОҚ раисининг биринчи ўринбосари ёшлар учун бу ерда яратиб берилган шароитлар, қад ростлаган замонавий спорт обектларини кўздан кечирди ва мутасаддилар билан фикр алмашди.

Равшан Ирматов суҳбат давомида Туризм ва спорт вазирлиги, МОҚ бўлажак офицерларимизнинг спорт билан шуғулланишлари учун зарур ёрдамни кўрсатишга, уларни малакали тренерлар билан таъминлашга тайёр эканлигини билдирди. Шунингдек, мутасаддилар ҳамкорликнинг келгуси қадами давомида қилинадиган ишлар бўйича бир қатор режаларни муҳокама қилиб олишди.