Мураббий Махачевнинг қайтиш муддатини тасдиқлади

Аввалроқ 34 ёшли россиялик аралаш яккакураш устаси ҳам навбатдаги жанги август ойига режалаштирилганини маълум қилганди.

"Ҳа, - деди Мендес "Матч ТВ"га берган интервьюсида август ойида жангга тайёргарлик ҳақида гапириб. - Ислам профессионал - у ҳар қандай жангга тайёр бўлади ва унга аъло даражада етиб боради".

Маълумот учун, Махачев ўтган йилнинг ноябрь ойида иккинчи вазн тоифасида чемпионлик камарини қўлга киритган эди. Миш-мишларга кўра, UFC унга жангни январь ойида ўтказишни таклиф қилган, бироқ Махачев рад этганди. Шундан сўнг Махачев ва енгил вазн тоифасидаги UFC чемпиони Илия Топурия ўртасидаги жанг 14 июнь куни Оқ уйдаги турнирда ўтказилиши режалаштирилгани ҳақидаги воқеа кенг муҳокама қилинди.

Чемпионнинг рақиби ҳақида ҳам аниқ маълумот йўқ. Махачев жамоаси рейтингда саккизинчи ўринни эгаллаб турган собиқ чемпион Камару Усманга қарши жангга қизиқиш билдирганди.

Рейтингнинг биринчи ва учинчи рақамли жангчилари Иан Гэрри Мачадо ва Майкл Моралес ижтимоий тармоқларда бир неча бор ҳаммаси ҳал бўлганини ва уларни Махачевга қарши чемпионлик жанги кутаётганини маълум қилишди. Эҳтимол, уларга собиқ чемпион Жек Делла Маддаленани мағлуб этган рейтингнинг иккинчи рақамли вакили Карлос Пратес ҳам қўшилади.